မုန်းမာန်ဖွဲ့သော မိုး

နိဒါန်း၏ အစ

မိုးသည် အပြင်၌ တစ်စိမ့်စိမ့်ရွာနေသည်။ ချောင်ကျကျထိုင်ခုံတွင် ထိုင်၍ တစ်ယောက်တည်းသောက်နေသော ထိုလူသည် ဥာဥ့်နက်လာသည့်တိုင် ပြန်မည့်ပုံမပေါ်သေးပေ။ သည်လူသည် ဆိုင်သို့လာ၍ သောက်နေသည်မှာ အပတ်တိုင်းလိုလိုပင်။ လာတိုင်းလဲ တစ်ယောက်တည်း။ ဖြည်းညှင်းစွာ သောက်ရင်း အပြင်သို့ ရီဝေစွာ ငေးကြည့်နေတတ်ခဲ့သော ထိုလူကို သူ သတိထားခဲ့မိသည်မှာ ကြာပြီ။ ဒီရပ်ကွက်တွင် သူဒီဆိုင်ကို ဖွင့်ခဲ့သည်မှာ မကြာသေး။ သူဖွင့်ပြီးနောက်ပိုင်း သည်လူသည် အပတ်တိုင်း ရောက်လာခဲ့ခြင်းဖြစ်သည်။ ဒီနေ့တော့ အပြင်တွင် မိုးတစ်စိမ့်စိမ့်ရွာနေသဖြင့် ဆိုင်ထဲတွင် လူရှင်းနေသည်။ ထို့ကြောင့် သူလဲ ပျင်းပျင်းရှိသည်နှင့် ထိုလူ၏ စားပွဲသို့ သွားကာ စကားစမြည်ပြောဖြစ်ခဲ့သည်။

" ဘယ်လိုလဲဗျ။ အပြင်မှာက မိုးတစ်စိမ့်စိမ့်ဆိုတော့ သောက်ရတာ အဆင်ပြေရဲ့လား "
ထိုလူက သူ့ကို တစ်ချက်မော့ကြည့်သည်။ ထို့နောက် တင်ထားသောခွက်ထဲမှ လက်ကျန်အရက်ကို ယူ၍ တစ်ချက်မော့လိုက်သည်။ ပြီးမှ
" အေးဗျာ။ ထိုင်ပါဦး။ စကားပြောကြရအောင်ပါ။ "
သူလဲ ရေငတ်တုန်း ရေတွင်းထဲ ကျဆိုသလို ခုံတစ်လုံးကို ယူ၍ ဆွဲထိုင်လိုက်သည်။ ထို့နောက်
" ကိုယ့်လူက ဒီရပ်ကွက်မှာနေတာ ထင်တယ်။ အပတ်တိုင်းလာတာကို သတိထားမိတယ်။ "
" ဟုတ်တယ်။ ကျွန်တော်က ဒီလမ်းရဲ့ အဆုံးက လမ်းထောင့်မှာ နေတာလေ။ ဒီဆိုင်က တိတ်ဆိတ်အေးချမ်းလို့။ ကျွန်တော်က တစ်ယောက်တည်းပဲ အေးအေးဆေးဆေး ထိုင်ချင်တာပေါ့ဗျာ။ "
သူငြိမ်နေလိုက်မိသည်။ လူတိုင်းမှာ သူ့အကြောင်းနှင့်သူ မဟုတ်လား။
ထိုလူမှပင် စတင်၍
" ခင်ဗျား အချစ်ကို ဘယ်လို သဘောထားလဲဗျ။ "
သူ ရုတ်တရက်မို့ ကြောင်သွားသည်။ နောက်မှ
" အချစ်ဆိုတာကို ကျွန်တော် သိပ်နားမလည်ဘူးဗျ။ ကျွန်တော်က အဲ့ဒါတွေနဲ့လဲ မရင်းနှီးပါဘူးဗျာ။ "
သူပြန်ဖြေသံအဆုံး၌ ထိုလူက သူ့စကားကို သဘောကျသည့်အလား ဟက် ခနဲ တစ်ချက်ရယ်လိုက်သည်။ ပြီးနောက်
" ခင်ဗျားကို ကျွန်တော် ပုံပြင်တစ်ပုဒ်ပြောပြမယ်။ ခင်ဗျား စိတ်ဝင်စားမယ်ဆိုရင်ပေါ့ "
သူဘာမှ ပြန်မပြောလိုက်မိ။ သည်လူ၏ မျက်နှာသည် ကြေကွဲခြင်းတို့ဖြင့် ပြည့်နှက်နေခဲ့သည်ပဲ။
။ xxxxxxxxxxxxxxxxxxxxxxx ။ xxxxxxxxxxxxxxxxxxxxxxx ။ xxxxxxxxxxxxxxxxxxxxxxx ။

ခိုင်နှင့်ချိန်းထားသည့် နေရာကိုရောက်တော့ နံနက် ၁၀နာရီ ထိုးခဲ့ပြီ။ ခိုင်ကတော့ သူ့ကို ပွစိပွစိ ဖြစ်နေတော့မှာ သေချာသည်။ ဒီလိုပါပဲ။ ခိုင်နှင့်ချိန်းတိုင်း အမြဲနောက်ကျတတ်တာ သူ့အကျင့်။ ခိုင်ထိုင်နေသော စားပွဲကို သူဝင်ထိုင်လိုက်တော့ ခိုင်က နှုတ်ခမ်းစူ၍ ဟိုဘက်လှည့်သွားသည်။ ခိုင်သည် သူ့အတွက်တော့ ကလေးတစ်ယောက်နှင့် တူပါပေ၏။
" ခိုင်၊ ဆောရီးကွာ၊ မောင်နောက်ကျသွားတယ်။ အဟဲ။ ညက ဘောလုံးပွဲကြည့်လိုက်မိလို့ကွ။ ပွဲက ကောင်းနေတာနဲ့။ အဟဲ။ "
သူ မျက်နှာချိုသွေးလိုက်သည်။ ခိုင်က
" ဟွန်း၊ အမြဲတမ်း အကြောင်းပြချက်နဲ့ချည်းပဲ။ မောင် အဲ့ဒီအကျင့်တွေကို ဘယ်တော့ပြင်မှာလဲ။ ခိုင်က မိန်းကလေးနော် အမြဲတမ်းမောင့်ကိုစောင့်နေရတာ။ ခိုင့်ကို သနားပါဦး။ "
သူပြုံးလိုက်မိသည်။ သူနောက်ကျတိုင်း ခိုင်အမြဲ သည်လိုပြောနေကျ။
" အင်းပါ ခိုင်ရာ။ နောင်ကို မောင် ဆင်ခြင်ပါ့မယ်။ ခုတော့ အတန်းနောက်ကျနေမယ်။ သွားကြရအောင်။ "
" နေဦးမောင်ရဲ့။ ခိုင့်သူငယ်ချင်း တစ်ယောက်ကို စောင့်ရဦးမယ်။ သူကလဲ ခိုင်တို့နဲ့အတူ ကျောင်းအပ်ချင်လို့တဲ့။ အဲ့ဒါကြောင့် သူ့ကိုပါ ချိန်းထားတာ။ သူကလဲ နောက်ကျနေတယ်ဟာ။ "
နှုတ်ခမ်းတစ်စူစူနှင့် ပြောနေသော ခိုင့်ကို ကြည့်ကာ သူပြုံးချင်သွားရသည်။ ထိုသို့ပါပဲ။ ခိုင်သည် သူ့ရှေ့တွင်တော့ ကလေးတစ်ယောက်လိုပင်။
" ဘယ်သူများလဲ ခိုင်ရ။ မောင်နဲ့သိတဲ့ သူလား။ "
" ဟုတ်ဘူးမောင်ရဲ့။ သူက ခိုင်နဲ့ အထက်တန်းတုန်းက ကျောင်းနေဖက် သူငယ်ချင်းလေ။ နောက်တော့ သူ့အဖေက မြို့နယ် ဆရာဝန်ကြီးဆိုတော့ သူ့အဖေပြောင်းတဲ့နောက်လိုက်ရင်း ခိုင်တို့ကွဲသွားကြတာ။ ပြီးခဲ့တဲ့ အပတ်ကမှ ဗိုလ်ချုပ်ဈေးကို ခိုင် အကျီင်္သွားအပ်ရင်း သူနဲ့ ပြန်တွေ့တာ။ အဲ့ဒါ ခိုင်က နိုင်ငံခြားဘာသာတက္ကသိုလ်မှာ ဘာသာစကားပြော ဒီပလိုမာတက်ဖို့ အစီအစဉ်လုပ်နေတဲ့အကြောင်း စကားစပ်မိပြီး ပြောဖြစ်တော့ သူကပါ တက်ချင်တယ်တဲ့လေ။ အဲ့ဒါကြောင့် ခိုင်လဲ ခေါ်လိုက်တာ။ "
ခိုင်ပြောသမျှ ခိုင့်မျက်နှာလေးကြည့်ရင်း နားထောင်နေသောသူသည် သူ့နားသို့ ရောက်လာသော သူမကို သတိမထားလိုက်မိပါချေ။
" ဆောရီးဟယ်။ မြတ်နိုး လမ်းမှာ ကား ဆီဝင်ထည့်နေလို့ နောက်ကျသွားတယ်။ စောင့်နေရတာ ကြာပြီလားဟင် နှင်းဆီ။ "
ခိုင်ရဲ့ နာမည်က နှင်းဆီခိုင် ရယ်ပါ။ သူတို့အားလုံးက ခိုင်လို့ခေါ်တတ်ခဲ့ပေမယ့် ခိုင့်ကို နှင်းဆီလို့ခေါ်ပြီး ၀င်ထိုင်လိုက်တဲ့ ထိုအမျိုးသမီးကို သူရုတ်တရက် လှည့်ကြည့်လိုက်မိသည်။
" ရပါတယ် မြတ်နိုးရဲ့။ ခိုင်တို့လဲ ခုပဲရောက်တာပါ။ သြော် ဒါနဲ့ မိတ်ဆက်ပေးရဦးမယ်။ ဒါက ခိုင့်ချစ်သူ မင်းထယ်ဝါတဲ့။ ဘူမိဗေဒ နောက်ဆုံးနှစ်လေ။ မောင် ဒါက မေမြတ်နိုးတဲ့။ မြန်မာစာနောက်ဆုံးနှစ်က။ ခိုင်ပြောတဲ့ သူငယ်ချင်းဆိုတာပေါ့။ "
သူ့ဘက်ကို စူးစူးစိုက်စိုက်ကြည့်၍ ပြုံးပြလာသော ထိုအမျိုးသမီးကို သူလဲ ပြန်ပြုံးပြလိုက်မိသည်။ ထိုနေ့က မေမြတ်နိုး ကားနှင့်ပင် သူတို့ ကျောင်းသွားဖြစ်ခဲ့ကြသည်ပဲ။

ထိုမှစ၍ သူတို့သုံးယောက်သည် စာသင်နှစ်တလျှောက်လုံး တစ်ပူးတွဲတွဲ ဖြစ်လာခဲ့လေတော့သည်။ အထူးသဖြင့် တိုက်ဆိုင်မှုဟုပဲ ဆိုလေမလား။ မြတ်နိုးသည် သူနှင့် တစ်လမ်းထဲနေသူဖြစ်နေလေသည်။ မြတ်နိုးတွင် မေမေမရှိတော့ပါ။ ထို့ကြောင့် မြတ်နိုးသူ့အိမ်သို့ စာမေးရန်ဟူသော အကြောင်းပြချက်ဖြင့်ရောက်လာလေတိုင်း မေမေနှင့် အမြဲစကားလက်ဆုံကြနေကြရယ်ပါ။ တစ်ခါတရံ သူအိမ်သို့ပြန်လာချိန်တွင် မြတ်နိုးကို မီးဖိုချောင်၌ မေမေနှင့် အတူ ချက်ပြုတ်နေသည်ကို တွေ့နေရမြဲ။ သူ့မေမေကလဲ သူ့တစ်ယောက်ထဲ ရှိတာဆိုတော့ မြတ်နိုးကို သမီးမိန်းကလေးအဖြစ် တွယ်တာတော့တာ မဆန်း။ ထိုအကြောင်းနှင့် ပတ်သတ်၍ ခိုင်က သူ့ကို ပြောခဲ့ဖူးသည်။
" မောင်နော်။ မြတ်နိုးက မောင့်အိမ်ကို သိပ်ပြီး ၀င်ထွက်လွန်းတယ်။ ခိုင်တော့ တကယ် စိတ်ပူတယ်သိလား။ "
" သြော် ခိုင်ရယ်။ မြတ်နိုးက အိမ်ချင်းနီးလို့ လာလည်တာပါ။ နောက်ပြီး သူ့မှာ အမေမှ မရှိတာပဲ။ အဲ့ဒါကြောင့် မောင့်မေမေကို သူက လာပြီး အဖေါ်လုပ်တာနေမှာပေါ့။"
သူကတောင် ခိုင့်ကို ပြန်ပြောဖြစ်ခဲ့သည်ပဲလေ။

သို့သော် သူ မမျှော်လင့်ခဲ့မိသည်က ကျောင်းပြီး၍ ခိုင့်ကို အိမ်ခေါ်သွားပြီး မေမေနှင့် မိတ်ဆက်ပေးရာက စလေသည်။ မေမေက ခိုင့်ကို သဘောမကျဟု ဆိုသည်။ ခိုင်တို့မျိုးရိုးကို မကြိုက်ဟုဆိုသည်။
" သားရယ်။ ဆင်းရဲတာ ချမ်းသာတာ အကြောင်းမဟုတ်ပါဘူး။ ဒါပေမယ့် မေမေကတော့ အမျိုးကို ကြည့်စေချင်တယ်။ လူမှာ အမျိုး ကြက်မှာ အရိုးတဲ့လေ။ မေမေကတော့ နှင်းဆီခိုင်ထက်စာရင် မြတ်နိုးလေးကိုပဲ ပိုသဘောကျတယ်သား။ "
ပြောပြီး ထထွက်သွားသော မေမေသည် တကယ်ကို ပြတ်သားလွန်းသည်ပဲ။ ဖေဖေ့ကို သူအားကိုးတကြီး ကြည့်မိလိုက်တော့ ဖေဖေက မင်းမေမေသဘော ဆိုသည့်အဓိပါယ်ဖြင့် ပခုံးတွန့်ပြသည်။ သူရင်မောသွားရသည်။

နောက်အပတ် သူခိုင်နှင့်တွေ့တော့ ခိုင်က သူ့ကို လက်ထပ်ခိုင်းသည်။
" မောင့်မေမေ ခိုင့်ဆီလာသွားတယ်။ မောင်နဲ့ သဘောမတူကြောင်းကို ပရိယာယ်နဲ့ ပြောသွားတယ်လေ။ ခိုင်ကတော့ မောင်နဲ့ မခွဲနိုင်ဘူး။ မောင် ခိုင့်ကို တကယ် ချစ်တယ်ဆိုရင် ခိုင်နဲ့ လက်ထပ်ဖို့ စီစဉ်ပါ" တဲ့။
သူတကယ် ရင်မောသွားရသည်။ သူသည်လဲ ခိုင့်ကို ချစ်သည်ပါပဲလေ။ ဒီတော့ ထုံးစံအတိုင်း ခိုင့်ကို ခိုးပြေးရတော့မည် ထင်ပါ့။

သူခိုးပြေးမည့်အကြောင်း သူငယ်ချင်း မင်းသူကို တိုင်ပင်တော့ မင်းသူက သူ့ကို မြတ်နိုးနှင့် တိုင်ပင်ရန် အကြံပေးသည်။ မြတ်နိုးမှာက ကားရှိသည်လေ။ သူ့မှာကတော့ ဆိုက်ကယ်သာလျှင်ရှိသည်ပဲ။ ထို့ကြောင့် သူမြတ်နိုးကို ဖွင့်ပြောလိုက်သည်။ သူ့အကြံက မြတ်နိုးကားဖြင့် ခိုင့်ကို သွားခေါ်မည်။ ထို့နောက် သူတို့ အဝေးပြေးကားဂိတ်သို့သွားမည်။ ထိုမှတဆင့် သူနှင့် ခိုင်တို့ တစ်နေရာရာသို့ သွားမည်။ မြတ်နိုးကလဲ အလွယ်တကူပင် သဘောတူသည်။ သြော် .. အရာအားလုံး အဆင်ပြေမှာပါလို့ သူမျှော်လင့်ခဲ့သည်ပါပဲလေ။

ခိုင်ကိုသွားခေါ်မည့်နေ့တွင် ခိုင်က မိုးချုပ်မှလာရန်မှာသည်။ ခိုင့်အဖေက အမြဲသောက်တတ်လေတော့ ရန်ရှာမှာ ဆိုးလို့ပါတဲ့လေ။ ထို့ကြောင့် သူနှင့်မြတ်နိုးတို့ မိုးချုပ်မှပဲ အိမ်မှ ထွက်ဖြစ်ခဲ့သည်။ ခိုင်သည် မှော်ဘီတွင် နေသူဖြစ်လေသည်။ မှော်ဘီနှင့်ရန်ကုန် မဝေးပါသော်လဲ သူ့စိတ်ထဲတွင် တစ်ကမ္ဘာကြာသလို ထင်နေမိလေသည်။ လမ်းတွင် မြတ်နိုးနှင့်တောင် စကားမပြောမိ။ မြတ်နိုးကလဲ တိတ်နေသည်ပဲလေ။

ထိုစဉ် မိုးတို့ ရုတ်တရက် အသဲအသန် ရွာချလေသည်။ မိုးသည်းသည်းအကြား ကားမောင်ေးနေသော မြတ်နိုးကိုတောင် သူမောင်းပေးရမလားဟု သူမေးဖြစ်ခဲ့သည်။ မြတ်နိုးက ရပါတယ် ဟုသာဖြေ၍ ရှေ့သို့သာ ဂရုတစိုက် မောင်းလေသည်။ မမျှော်လင့်မိသည်က ရန်ကုန်က အထွက်တွင် မြတ်နိုး၏ကားသည် ဆီကုန်သွားလေတော့သည်။ ထိုသို့ပါပဲ။ မြတ်နိုးသည် ကားကိုဆီဖြည့်ဖို့ အမြဲမေ့နေကြရယ်ပါ။ သူစိတ်ရှုပ်သွားမိရသည်။ မြတ်နိုးကိုကြည့်တော့လဲ မျက်နှာလေးက ငိုမဲ့မဲ့ရယ်။
" မြတ်နိုးရာ။ နင်ကတော့ လုပ်ချလိုက်ပြန်ပါပြီ။ အရေးကြီးပါတယ်ဆိုမှ ခု ဘယ်လိုလုပ်မလဲ။ နင့်ဟာလေ။ တကယ်ပါပဲ။ အမြဲတမ်း ရှပ်ပြာ ရှပ်ပြာနဲ့။ ဟိုဟာမေ့ ဒီဟာမေ့နဲ့။ ခု ဘယ်လိုလုပ်ကြမလဲ။ မိုးတွေက အရမ်းရွာနေတော့ ကားအသွားအလာကလဲ ရှင်းနေတယ်။ နင်လုပ်တာနဲ့ဟာ။ ဘာမှန်းကို မသိဘူး။ "
သူ စိတ်ရှုပ်ရှုပ်နှင့် မြတ်နိုးကိုပြောမိတော့ မြတ်နိုးသည်လဲ မျက်နှာငယ်လေးဖြင့် ရှိနေခဲ့သည်ပဲလေ။ သူကားနောက်ခန်းထဲမှာ ထည့်ထားသော ထီးတစ်ချောင်းကို ဆွဲယူ၍ အပြင်ထွက်လိုက်သည်။ ကားတား၍ ရလို့ရငြားပေါ့လေ။
" ထယ်ဝါ။ နင်ကားတားလို့ရရင် အဲ့ဒီကားနဲ့ မှော်ဘီကို လိုက်သွားလိုက်နော်။ နှင်းဆီက စောင့်နေတာရယ်။ ငါကဘာမှမဖြစ်ဘူး။ ငါ့ကိုထားခဲ့ပါ။ "
သူမြတ်နိုးကို လှည့်ကြည့်လိုက်မိသည်။ သူဘယ်လိုထားခဲ့ရက်ပါ့မလဲလေ။ ညမှောင်မှောင် မိုးသည်းသည်းမှာ မြတ်နိုး တစ်ခုခုဖြစ်သွားမှဖြင့် သူ့တစ်သက်နောင်တရ၍ ဆုံးမည် မထင်။ ခုလောလောဆယ် ဆီရအောင် ရှာရမည်။ နောက်ကျ၍ ခိုင်စိတ်ကောက်လဲ ခနပေါ့ဟု သူဖြေတွေး တွေးလိုက်မိသည်။

သို့သော် သူပဲ ကံဆိုးချင်၍လားမသိ။ ထိုညက သူတို့ ဆီလုံးဝ ရှာမရပေ။ မိုးကလဲ တစ်ညလုံးကောင်းနေခဲ့သည်။ ထို့ကြောင့်သူတို့ နှစ်ယောက်လုံး ကားပေါ်မှာတင်ပဲ မိုးလင်းခဲ့ရလေသည်။ ခိုင်ရယ်.. မောင့်ကိုတစ်ညလုံး မအိပ်ပဲများ စောင့်နေလေရော့သလားနော်။ မောင့်ကို ခွင့်လွှတ်ပါခိုင်။ ကံကြမ္မာက မောင့်ကို မျက်နှာသာ မပေးခဲ့ပဲကိုးလေ။ သူတစ်ညလုံး ဆိုဖာနောက်ကို လှန်ချ၍ အိပ်မရစွာ ခိုင့်ကိုပဲ တွေးနေမိသည်။ မြတ်နိုးသည်လဲ သူ့လိုပါပဲလေ။

နံနက်မိုးလင်း၍ မိုးတိတ်သွားပြီးနောက် ကားဆီလဲ ကံအားလျော်စွာ ရလေတော့သည်။ ထို့နောက် သူတို့ ခိုင့်အိမ်ကို ရောက်တော့ ခိုင်က သူ့ကို စိတ်ဆိုး၍ ထွက်မတွေ့တော့ပေ။ ခိုင်စိတ်ကောက်နေသဖြင့် မြတ်နိုးကိုလဲ အားနာသဖြင့် သူတပ်ခေါက်ပြန်ခဲ့ရလေတော့သည်။ နောက်နေ့မှ ခိုင့်ကို ချော့၍ သူထပ်ကြိုးစားမည်ဟု ဆုံးဖြတ်ပါသော်လည်းလေ... ။

အဲ့ဒီနံနက်က သူတို့နှစ်ယောက် အိမ်ပြန်အရောက်၌ ပြဿနာက စလေတော့သည်။ မြတ်နိုး၏ ဖေဖေသည် မြတ်နိုးတစ်ညလုံး ပျောက်သွားသည့်အတွက် စိတ်ပူကာ သူ့အိမ်သို့ လှမ်းမေးသည်။ သူ့အိမ်ကလဲ သူပါတစ်ညလုံးပြန်မလာသဖြင့် စိတ်ပူနေကြသည်။ နောက် နံနက်ရောက်တော့ မြတ်နိုးနှင့်သူက ကားတစ်စီးထဲ အတူပြန်လာလေတော့ နှစ်ဘက်မိဘများ၏ စစ်မေးခြင်းကို ခံရပါလေတော့သည်။ သူရော မြတ်နိုးပါ ရိုးသာဖြူစင်သည်မို့ သူ့တွင် စိုးရိမ်စိတ်မရှိခဲ့ပါသော်လည်း မြတ်နိုး၏ " သမီးတို့ နှစ်ယောက် တစ်ညလုံး အတူရှိနေခဲ့ပါတယ် ဖေဖေ " လို့ ဖြေကြားသံကို သူကြားလိုက်ရသည့်အချိန် ... သူ့ရင်သည် အံ့သြခြင်းတို့ဖြင့် ပြည့်နှက်လျှက် မြတ်နိုးကို အလန့်တကြားကြည့်လိုက်မိသည်။ မြတ်နိုး၏ မျက်နှာကမူ တည်ငြိမ်လျက်ပါပေ။

" ကျွန်တော်တို့ တူတူရှိခဲ့ပေမယ့် ကျွန်တော်တို့ ဘာမှ မဖြစ်ခဲ့ကြဘူး အန်ကယ်။ ကျွန်တော်တို့ နှစ်ယောက် ကားဆီကုန်ပြီး မိုးအရမ်းရွာနေလို့ ပြန်လာမရတာပါ။ ကျွန်တော်တို့ ဘာဆို ဘာမှ မဖြစ်ခဲ့ကြပါဘူးဗျာ။ မြတ်နိုး နင့် အဖေကို ရှင်းပြလေဟာ။ ငါတို့ ဘာမှ မဖြစ်ခဲ့တဲ့ အကြောင်းကို "
သူကြိုးစား၍ ရှင်းပြအပြီး သူ့ဖေဖေ၏ လက်သီးက သူ့မေးရိုးပေါ်သို့ ကျရောက်လာခဲ့လေတော့သည်။ သူအံ့သြခြင်းမက အံ့သြခဲ့ရသည်။ ဖေဖေနှင့် မေမေသည် သူ့ကို တစ်ဦးတည်းသောသားမို့ ရိုက်ဖို့နေနေသာသာ ဆူတောင် မဆူရက်ခဲ့ပါပေ။ ခုတော့ သူ့ကို ဖေဖေ ထိုးခဲ့လေပြီ။

" ထယ်ဝါ ... မင်း ငါ့သားမဟုတ်ဘူးလား။ ကိုယ့်ကြောင့် သူများသမီးမိန်းကလေး အိနြေ္ဒမဲ့ရတဲ့အဖြစ် မင်းမှာတာဝန်ရှိတယ်ဆိုတာ မင်းသိဖို့ကောင်းတယ်။ ခုတော့ မင်းကြောင့် မြတ်နိုး ပတ်ဝန်းကျင်မှာ ဘယ်လိုမျက်နှာပြမလဲ။ မင်းတို့ဘာမှ မဖြစ်ခဲ့ဘူးပဲထား။ မြတ်နိုးက မိန်းကလေးကွ။ ပတ်ဝန်းကျင်ကို သူဘယ်လို လိုက်ရှင်းပြမလဲ။ ဒီတော့ ဖေဖေနောက်ဆုံးပြောမယ်သား။ မင်း မြတ်နိုးကို လက်ထပ်ပါ။ တစ်လက်စတည်းနဲ့ ဒီက အကိုကြီးကိုလဲ ကျွန်တော် အနူးအညွတ်တောင်းပန်ပါတယ်ဗျာ။ မြတ်နိုးကို ကျွန်တော့်သားနဲ့ လက်ထပ်ခွင့်ကိုပေးပါ။ အစစ အရာရာ ကျွန်တော်တို့ဘက်ကပဲ တာဝန်ယူပါတယ်ဗျာ။ "
သူအရာအားလုံးကို အိပ်မက်ပမာ ခံစားလိုက်ရသည်။ မြတ်နိုးသည်လဲ ခေါင်းကိုငုံ့၍ ငိုရှိုက်နေသည်ပဲလေ။ သူဘယ်လိုမှ ရှင်းပြမရ။ ဖေဖေ၏ တစ်ချက်လွှတ် အမိန့်အောက်၌ မြတ်နိုးကို ထိုနေ့တွင်ပင် တရားရုံး၌ လက်မှတ်ထိုး၍ လက်ထပ်လိုက်ရလေတော့သည်။ သူ့ရင်ထဲတွင်တော့ ...
ခိုင်ရယ် ... ။

ထိုနေ့မှစ၍ သူ၏ဖေဖေ လက်ဖွဲ့သော အိမ်နှင့်ခြံတွင် သူတို့ ပြောင်းနေခဲ့ရလေသည်။ သူကတော့ လက်ထပ်ပြီးနေ့မှ စ၍ မြတ်နိုးနှင့် ကင်းနိုင်သမျှ ကင်းအောင် နေခဲ့မိသည်။ သူ့စိတ်ထဲတွင် ခိုင်နှင့်သူ့ကို ဝေးအောင်လုပ်သော မြတ်နိုးကို မုန်းခဲ့မိသည်။ မြတ်နိုးက အိမ်ဖော်ကောင်မလေး ခေါ်ထားမယ်ဆိုတာကိုတောင်မှ သူက လက်မခံခဲ့ပေ။ သူနှင့် မြတ်နိုးအကြောင်းကို ဘယ်သူမှ မသိစေချင်၍ ဖြစ်သည်။ သူကတော့ မြတ်နိုးက အစစ ဂရုစိုက်တာတောင်မှ ကင်းကင်းနေနိုင်အောင် ကြိုးစားခဲ့မိသည်ပဲလေ။ ဟုတ်သည်။ သူ့ရင်တွင် ခိုင်နှင့်သူ့ကို ဝေးအောင် လုပ်သော မြတ်နိုးကို ....။

သူအလုပ်ဝင်သော အခါ ခိုင်နှင့်ပြန်ဆုံခဲ့ရသည်။ ခိုင်ကတော့ သူ့ကိုခွင့်လွှတ်တယ်ဟု ဆိုခဲ့သည်ပဲ။ သြော် ခိုင်ရယ်။ သူကတော့ အိမ်ထောင်သည်ပီသစွာ လူမှုကျင့်ဝတ်ကို မဖောက်ဖျက်ခဲ့။ ခိုင့်ကို ချစ်သော်ငြားလည်း သူ့တွင် လူသိရှင်ကြား ဇနီးရှိခဲ့ပြီ။ ထို့ကြောင့် သာမန် လုပ်ဖော်ကိုင်ဖက် သူငယ်ချင်းအဆင့်ထက် ပိုပြီး ခိုင့်ကို မဆက်ဆံခဲ့။ ဒါကို ခိုင်ရော ပတ်ဝန်းကျင်ကရော သိခဲ့သည်ဟု သူထင်သည်။

သို့သော် တစ်နေ့။ ထိုတစ်နေ့သည် သူ့အဖို့ တကယ်ကို ဆိုးရွားလွန်းပေစွ။

ခိုင်သည် သူ့ကို တစ်နေရာ၌ အေးအေးဆေးဆေး တွေ့ချင်ပါသည်ဟု ချိန်းခဲ့သည်။ ထို့ကြောင့်သူ ခိုင်ချိန်းသည့်နေရာသို့ သွားဖြစ်ခဲ့သောအခါ ခိုင်က သူ့ကိုငိုပြီး
" ထယ်ဝါ၊ ခိုင်လေ ထယ်ဝါ လက်ထပ်ပြီးထဲက ထယ်ဝါနဲ့ ကင်းကင်းနေတာ ထယ်ဝါ သိပါတယ်နော်။ အဲ့ဒါကို ဟိုနေ့က ခိုင်နေမကောင်းချင်လို့ဆိုလို့ ထယ်ဝါက ခိုင့်ကို ကားနဲ့ အိမ်ပြန်လိုက်ပို့တာကို မြတ်နိုးမြင်သွားပြီး ခိုင့်ဆီကိုလာတယ်။ နောက် ထယ်ဝါနဲ့ ဖြစ်နေရင်လဲ ရပ်တန်းက ရပ်ဖို့ပြောသွားတယ်။ ခိုင် အရမ်းရှက်တယ် ထယ်ဝါရယ်။ ခိုင့် ဂုဏ်သိက္ခာတော့ ရစရာမရှိတော့ပါဘူး။ " ဆိုပြီး ပြောလေတော့သည်။ သူ့ရင်တွေ တင်းကျပ်သွားသည်။ မြတ်နိုးသည် သူ့ကို ဘာမှ မပြော မမေးခဲ့ပါ။ သူစိတ်တိုသွားမိသည်။ ထိုနေ့က သူ အိမ်သို့ ချက်ချင်းပြန်ခဲ့မိသည်။

အိမ်ရောက်တော့ မြတ်နိုးကို ရုတ်တရက် ရှာမတွေ့။ သူအိမ်ပေါ်တက်သွားမိတော့ မြတ်နိုးသည် သူ့အိပ်ခန်းထဲက ကုတင်ပေါ်တွင် စာဖတ်နေလေသည်။ သူရုတ်တရက် မြတ်နိုးကို ဆွဲထူမိလိုက်သည်။
" ထစမ်း မေမြတ်နိုး။ နင်ဘာလို့ ခိုင့်ကို ဒီလို သွားပြီး အရှက်ခွဲခဲ့ရတာလဲ။ ငါနဲ့ ခိုင်က နင်လုပ်လို့ ကွဲသွားပြီးတဲ့နောက်မှာ သူငယ်ချင်းအဖြစ်ပဲ ဖြူဖြူစင်စင် ရှိခဲ့တာကွ။ တောက် ။ နင်တော်တော် မိုက်ရိုင်းပါလားဟင်။ နင် ဘယ်လိုမိန်းမမျိုးလဲ မေမြတ်နိုး။ ပြောစမ်းပါဦး။ "
မြတ်နိုးသည် သူ့ကို ထိတ်လန့်တကြားကြည့်၍ ကြောင်နေခဲ့သည်။ ပြီးမှ
" ထယ်ဝါ၊ မြတ်နိုးက ထယ်ဝါတို့ကို ပတ်ဝန်းကျင်က ပြောနေခဲ့တာကို ဒီတိုင်းလက်ပိုက်ပြီးနားထောင်နေခဲ့တာပါနော်။ ခုက မြတ်နိုး မျက်စိနဲ့ ကိုယ်တိုင်မြင်ခဲ့ရတာပါ။ အဲ့ဒါကြောင့် မြတ်နိုးက နှင်းဆီကို သွားပြီး ရှင်းအောင် မေးကြည့်ချင်ရုံပဲရှိခဲ့တာ။ မြတ်နိုးဘာမှ ရိုင်းရိုင်းစိုင်းစိုင်း မလုပ်ခဲ့မိဘူးနော်။ "
" မင်းက ရှင်းအောင်မေးချင်ရင် ငါ့ကိုမေးပါလားကွ။ ခုတော့ မဆိုင်တဲ့ခိုင့်ကို ဘာကိစ္စ သွားစော်ကားရတာတုန်း။ မင်းအဲ့လိုလုပ်ပုံက ခိုင့်ကို စော်ကားရာရောက်တယ်ဆိုတာရော မင်းခေါင်းက သိရဲ့လား။ "
သူဒေါသတွေ အရမ်းထွက်နေမိသည်။ စိတ်ထဲတွင် ဘာကို ဒေါသထွက်မိလို့ ထွက်မိမှန်းလဲ မသိတော့ပါချေ။
" သြော်၊ ကိုမင်းထယ်ဝါ။ ရှင့်ကိုမေးရအောင် ရှင်က ကျွန်မကို တစ်နေကုန်နေလို့မှ စကားကောင်းကောင်းပြောခဲ့ဖူးလို့လား။ ကျွန်မက ရှင်နဲ့ ပြောဖို့ လာရင်တောင် ရှင်က ကျွန်မအနားကနေ ရှောင်သွားတတ်ခဲ့တာလေ။ ကျွန်မကို ရှင်က စကားပြောခွင့်မှ မပေးခဲ့ဘဲ။ လက်ထပ်ထားတဲ့ ဇနီးမယားတစ်ယောက်အနေနဲ့ ကျွန်မ ဒီလိုလုပ်လိုက်မိတယ်။ အဲ့ဒါ ဘာဖြစ်လဲ။ ရှင်က ရှင့်ဟာမ ထိတော့ နာတယ်ပေါ့လေ။ ဟုတ်လား။ "
သူအံ့သြသွားမိရသည်။ မြတ်နိုးသည် သူ့ကို ခုလို တစ်ခါမှ ပြန်မပြောခဲ့ဖူးပါပေ။ အံ့သြခြင်းနှင့်အတူ ဒေါသတို့ ရင်၌ ဖြစ်တည်၏။
" လက်ထပ်ထားတဲ့ ဇနီးမယား။ ဟုတ်လား။ မင်းက စာချုပ်နဲ့ပဲ လက်ထပ်ထားတဲ့ မိန်းမပါကွ။ "
သူပြောပြောဆိုဆို ဘီရိုကို ဖွင့်၍ လက်ထပ်စာချုပ်ကို ဆွဲထုတ်လိုက်သည်။
" ဟောဒီစာချုပ်သာ မရှိရင် မင်းက ငါ့ဇနီးမှ မဟုတ်တော့ဘဲ။ ဟဟ ။ "
သူခြောက်ကပ်စွာ ရီ၍ စာချုပ်ကို မြှောက်လိုက်သည်။ ထို့နောက် သူဖြဲဖို့ဟန်ပြင်လိုက်သည်။

" ထယ်ဝါ၊ မလုပ်ပါနဲ့။ မလုပ်ပါနဲ့ ထယ်ဝါ။ မြတ်နိုးကို သနားရင် မလုပ်ပါနဲ့။ ထယ်ဝါ့ကို မြတ်နိုးချစ်ခဲ့မိလို့ပါ။ မြတ်နိုးသိပ်ချစ်ခဲ့မိလို့ လက်ထပ်ဖို့ ကြိုးစားခဲ့ရတာပါ ထယ်ဝါရဲ့။"
သူမယုံကြည်စွာ မြတ်နိုးကို ကြည့်လိုက်မိသည်။ မြတ်နိုးသည် ပါးပြင်ပေါ်တွင် မျက်ရည်တို့ကျ၍ သူ့ကို လှမ်းအော်ကာ သူ့လက်ထဲမှ စာချုပ်ကို လှမ်း၍ လုလေတော့သည်။ သူတစ်ချက် မြတ်နိုးကို တွန်းထုတ်လိုက်မိသည်။ မြတ်နိုး ကုတင်ပေါ်သို့ လဲကျသွားလေသည်။ မြတ်နိုးက သူ့ကို အံ့သြစွာကြည့်နေသည်ကို သူတစ်ချက်အေးစက်စက် စိုက်ကြည့်လိုက်မိသည်။
ထို့နောက်
" ဒီစာချုပ်မရှိရင် မင်းဟာ ငါ့မိန်းမ မဟုတ်တော့ဘူး မေမြတ်နိုး။ မင်းငါ့ကို ဘယ်တော့မှ ပိုင်ဆိုင်ရလိမ့်မယ် စိတ်မကူးနဲ့။ ငါမင်းကို သိပ်မုန်းတယ်။ "
သူပြောလဲပြော စာချုပ်ကိုလဲ ဆွဲဖြဲလိုက်လေတော့သည်။ မြတ်နိုးသည် သူ့ကို စိုက်ကြည့်သည်။ ထို့နောက် သူပစ်ပေါက်လိုက်၍ လေထဲတွင် လွင့်ဝဲသွားသော စာရွက်အပိုင်းအစများကို မျက်ရည်စိုရွှဲနေသော မျက်လုံးအစုံဖြင့် လိုက်ကြည့်နေသည်။ မြတ်နိုး၏ ပုံသည် အသိစိတ်ကင်းမဲ့သူတစ်ယောက် အလား။

သူ မြတ်နိုးအခန်းထဲမှ ထွက်လာခဲ့လိုက်သည်။ လှေကားကို ပြေးဆင်း၍ ကားပေါ်တက်ကာ ခပ်ကြမ်းကြမ်းမောင်းထွက်ခဲ့လိုက်မိသည်။ သူ့ရင်သည် ပူလောင်လွန်းပေစွ။ သူဘာလုပ်ရမည်မသိတော့။ မြတ်နိုးသည် သူ့ကိုချစ်ပါသည်တဲ့။ သူမယုံကြည်နိုင်။ မြတ်နိုးသည် အေးဆေးသည်။ လိမ္မာယဉ်ကျေးသည်။ အိမ်ရှင်မ ပီသသည်။ သူ့အပေါ်လဲ ဂရုတစိုက်ရှိခဲ့သည်။ သို့သော် သူနှင့်ခိုင့်အကြောင်းသိရဲ့နှင့် သူနှင့်ခိုင့်ကို ကွဲအောင်လုပ်ခဲ့သော မြတ်နိုးအပေါ် သူသိပ်မကြည်လင်။ သေချာပြန်စဉ်းစားကြည့်မိတော့ မြတ်နိုးတွင် ဘာအပြစ်မှ မရှိသလိုပင်။ သူစိတ်ရှုပ်ရှုပ်ဖြင့် သူငယ်ချင်းဖြစ်သူ မင်းသူဆီသို့ ထွက်လာခဲ့လိုက်မိသည်။ မင်းသူအိမ်တွင် အေးအေးဆေးဆေးနေမည်ဟု။

ရက်သတ္တပတ် တစ်ပတ်ကြာသွားခဲ့သည်။ အရာအားလုံးအေးဆေးလောက်ပြီဟု သူထင်မှတ်ခဲ့မိသည်။ သို့သော်...။

ထိုနေ့က မင်းသူ သူစာဖတ်နေရာသို့ ရောက်လာသည်။ မျက်နှာလုံးဝမကောင်း။ လက်ထဲတွင်လဲ ဒိုင်ယာရီစာအုပ်တစ်အုပ်နှင့်။
" ထယ်ဝါ။ မင်းသိပ်မှားသွားပြီ သူငယ်ချင်း။ ငါဒီနေ့ပဲ မင်းအမေနဲ့ လမ်းမှာတွေ့လို့ မင်းအမေခေါ်လို့ မင်းတို့အိမ်ကို ရောက်ဖြစ်ခဲ့တယ်။ အဲ့ဒါကြောင့် မြတ်နိုးအကြောင်းသိခဲ့ရတာပဲ။ ဟောဒီမှာ မင်းအမေက မင်းကို ပေးခိုင်းလိုက်တဲ့ မြတ်နိုးရဲ့ဒိုင်ယာရီ။ မင်းသိပ်ရက်စက်တယ်ကွာ။ အပြစ်မဲ့တဲ့ မြတ်နိုးကို မင်းမို့ လုပ်ရက်လေခြင်း သူငယ်ချင်းရာ။"
သူကြောင်နေမိသည်။ ပြောပြောဆိုဆို လက်ထဲက စာအုပ်ကို သူ့အားပေး၍ ထွက်သွားပါသော မင်းသူ၏ နောက်ကျောပြင်ကို ကြည့်ကာ သူ့တွင် စကားလုံးတို့ ဆွံ့အနေခဲ့မိသည်။ ထို့နောက်မှ မြတ်နိုး၏ စာအုပ်လေးကို ဖွင့်ကြည့်မိခဲ့သည်။ သူ့ရင်တစ်ခုလုံးသည် ... ။

ဒိုင်ယာရီထဲတွင် သူနှင့်စတွေ့သောနေ့ သူနှင့် လက်ထပ်သောနေ့ စသည်ဖြင့် ရက်တစ်ရက်စီတိုင်းအတွက် အမှတ်အသားတစ်ခုစီရှိခဲ့ပါသည်။ နောက်ဆုံးစာမျက်နှာအရောက်တွင်တော့
့
မောင်
ကျွန်မ မောင်နဲ့ စတွေ့တဲ့အချိန်မှာ မောင့်မှာ နှင်းဆီခိုင်ဆိုတာ ရှိနှင့်ခဲ့ပြီးပါပြီ။ ကျွန်မ အလိုက်သိစွာ ကျွန်မရဲ့ချစ်ခြင်းကို မြိုသိပ်ခဲ့ပါတယ်။ ဒါပေမယ့်မောင်ရယ်။
ကျွန်မလေ မောင်နဲ့ပတ်သတ်ပြီး အရာရာကို ဖြည့်ဆည်းပေးခဲ့ဖို့ ကြိုးစားခဲ့ပါတယ်။ မောင့်ကို ချစ်မြတ်နိုးရလွန်းလို့ လက်ထပ်ဖို့ ကြိုးစားခဲ့မိတာပါ။ လက်ထပ်ပြီးရင်တော့ မောင်ကျွန်မကို ချစ်လာမှာပါလို့ ရူးသွပ်စွာ မျှော်လင့်ခဲ့မိပေမယ့် မောင်က ကျွန်မထင်တာထက်ကို ပိုအေးစက်လွန်းပါတယ်လေ။ ကျွန်မ တကယ်ကို ရင်နင့်ခဲ့ရပါတယ်မောင်။ ကျွန်မရဲ့ချစ်ခြင်းမှန်ရင်လေ မောင့်ဆီက အချစ်ကို ရ ရပါလို၏လို့ ဆုတောင်းပေမယ့် ကျွန်မဆုတောင်းမပြည့်ခဲ့တာ ဘာ့ကြောင့်ပါလိမ့်နော်။
ကျွန်မကို ခွင့်လွှတ်ပါမောင်။ ကျွန်မ ဒီနေ့တော့ မောင်နဲ့ နှင်းဆီကို ကားတစ်စီးထဲ တူတူတွေ့လိုက်ရတော့ ရင်ထဲမှာ နေဆယ်စင်းမက ပူလောင်ခဲ့ရတယ်။ ရက်စက်လိုက်တာမောင်ရယ်။ ကျွန်မ နှင်းဆီနဲ့ သွားတွေ့ဖြစ်ခဲ့တယ်။ နောက် နှင်းဆီကို မောင့်ကို ချစ်နေတယ်ဆိုရင်တော့ မောင်စိတ်ချမ်းသာအောင် ကျွန်မ ကွာရှင်းပေးပါ့မယ်လို့ ပြောခဲ့မိတာ မောင် ကျွန်မကြောင့် စိတ်မဆင်းရဲစေချင်တော့လို့ပါ။ ဒါပေမယ့် ကျွန်မရင်ထဲမှာတော့ ...။

သူဆက်မဖတ်နိုင်တော့ပါ။ ခိုင်သည် သူ့ကို ညာခဲ့သည်။ ခိုင်၏ မာယာကြောင့် သူမြတ်နိုးကို ရက်စက်ခဲ့မိလေသည်။ သူမှားပြီ။ မြတ်နိုးသည် စိတ်ထားနူးညံ့ပါလေသော မိန်းကလေး။ သူ့အပေါ်လဲ ချစ်နိုင်လွန်းသည်။ အစစ ဂရုတစိုက်ရှိခဲ့သည်။ သူသည်သာ ခိုင်နှင့်ပတ်သတ်၍ မြတ်နိုးကို ရက်စက်ခဲ့မိတာပင်။ သြော်မြတ်နိုးရယ် ... ရင်တွင် နောင်တရခြင်းနှင့်အတူ ချစ်ခြင်းသည် ဖြစ်တည်၏။

သူ မင်းသူကိုတောင် မပြောနိုင်တော့ပဲ ချက်ခြင်း ကားပေါ်တက်၍ အိမ်သို့ ထွက်လာခဲ့မိလိုက်သည်။ သူ့ရင်သည် မြတ်နိုးကု တွေ့ချင်စိတ်ဖြင့် ပြည့်သိပ်နေခဲ့သည်ပဲလေ။ မြတ်နိုးနှင့်တွေ့လျှင် သူတောင်းပန်မည်။ သူသည်လဲ မြတ်နိုးကို ချစ်မိပါကြောင်း ၀န်ခံရမည်။ ထို့နောက် မြတ်နိုးကို သူ၏ချစ်ခြင်းဖြင့် ပျော်ရွှင်စေမည်။ သူအတွေးနှင့်အတူ ပြုံးလိုက်မိသေးသည်။

သူအိမ်ကိုရောက်တော့ မြတ်နိုးဖေဖေက ဆီး၍ သူ့ကိုထိုးသည်။ သူတစ်ချက်ယိုင်သွားကာ မြတ်နိုးဖေဖေကို တအံ့တသြ ကြည့်မိလိုက်သည်။
" မင်းပြန်လာသေးတယ်နော် မင်းထယ်ဝါ။ မင်းကြောင့် ငါ့သမီးလေး ... ။"
မြတ်နိုးဖေဖေသည် ယောက်ျားကြီးတန်မဲ့ မျက်ရည်ကျလေတော့သည်။ သူ မြတ်နိုးအတွက် စိတ်ပူသွားရသည်။ မြတ်နိုးများ မတော်တဆ သူ့ကြောင့် လူ့လောကမှ ထွက်သွားလျှင် ... အိုး ... မဟုတ်ပါစေနဲ့။ သူ့ရင်သည် တွေးရင်းဖြင့် ပူလောင်လာရသည်။ ဘုရား ဘုရား။ မြတ်နိုးဘာမှ မဖြစ်ပါစေနဲ့။
" မြတ်နိုးဘာဖြစ်လို့လဲ အန်ကယ်။ ကျွန်တော့်ကို ပြောပါဗျ။ မြတ်နိုး ခုဘယ်မှာလဲဗျ "
သူ ဟန်မဆောင်နိုင်စွာ အငမ်းမရမေးလိုက်မိသည်။ မြတ်နိုးဖေဖေက မျက်ရည်သုတ်လျက် အိမ်ပေါ်သို့ လက်ညှိုးညွှန်ပြလေသည်။ သူအိမ်ပေါ်ထပ် မြတ်နိုးအခန်းသို့ ပြေးတက်သွားလိုက်မိသည်။ မြတ်နိုးအခန်းရှေ့ရောက်တော့ သူအခန်းတံခါးကို ဖြေးညင်းစွာ ဖွင့်လိုက်မိသည်။

သူချစ်ရပါလေသော သူ၏မြတ်နိုးသည် ကြမ်းပြင်တွင် ထိုင်၍ ခေါင်းကို ငုံ့ထားသည်။ ဘေးတွင်လဲ သူနှင့် မြတ်နိုး သူငယ်ချင်းဘ၀က မြတ်နိုးမွေးနေ့တွင် သူဝယ်၍ လက်ဆောင်ပေးခဲ့ပါလေသော ၀က်ဝံရုပ်ကြီး ချထားသည်။ မြတ်နိုး၏ ရှေ့တွင်တော့ သူ စုတ်ဖြဲခဲ့ပါလေသော လက်ထပ်စာချုပ် အပိုင်းအစများကို တိပ်နှင့် တစ်ခုစီကပ်၍ ဆက်ထားပါလေသော အစိတ်စိတ်အမြွှာမြွာ စာချုပ်တစ်စောင်။
" မြတ်နိုး "
သူနာကျင်စွာဖြင့် ခေါ်လိုက်မိသည်။ မြတ်နိုး၏ ဦးခေါင်းသည် ဖြေးညှင်းစွာဖြင့် မော့လာသည်။ မြတ်နိုး၏ ပါးပြင်သည် မျက်ရည်များဖြင့်စိုစွတ်လျက်ရှိနေချေသည်ပဲ။ မြတ်နိုးသည် သူ့ကို ပြူးကြောင်၍ ကြည့်သည်။ ထို့နောက် ခေါင်းကို ပြန်ငုံ့သွားသည်။ သူ မြတ်နိုးရှေ့တွင် ထိုင်ချလိုက်မိသည်။
" အား။ မောင် ရေလုပ်ပါဦး။ ဒီမှာ ဘယ်သူကြီးလဲ မသိဘူး။ မြတ်နိုးရှေ့မှာ လာထိုင်ပြီး မြတ်နိုးကို ကြည့်နေတယ်။ မြတ်နိုးကို ကယ်ပါမောင်ရဲ့။ သွား သွား။ မြတ်နိုးကို လာမကြည့်နဲ့။ မြတ်နိုးမောင်က မကြိုက်ဘူးရယ်။ အော်ငိုလိုက်မှာနော်။ မောင် လုပ်ပါဦး။ သူ့ကို မြတ်နိုးမသိဘူး။ အီးး "
သူလန့်သွားမိသည်။ မြတ်နိုးသည် ၀က်ဝံရုပ်ကြီးကို ဖက်၍ သူ့ကို အတင်းအော်ထုတ်နေလေသည်။ ၀က်ဝံရုပ်ကြီးကိုလဲ မောင်ဟုခေါ်၍ သူ့ကို ပြူးကြောင်သော မျက်လုံးအစုံဖြင့်ကြည့်၍ ပြောနေပါသော မြတ်နိုးငယ်သည် အရာရာကို မေ့သွားခဲ့လေပြီပဲ။ ချစ်သူ၏ ရက်စက်ခြင်းကို ရင်နှင့်မဆန့်အောင် ခံစားလိုက်ရပြီးနောက်တွင်တော့ မြတ်နိုး၏ ခံစားတတ်သော စိတ်တို့သည် သွေးပျက်၍ နောက်သွားခဲ့ရလေပြီတကား။
သူ့ရင်သည် အပိုင်းပိုင်းအစစ ကွဲကြေသွားသလို ခံစားလိုက်ရသည်။
သူ၏ ရင်သည် နောင်တရခြင်းနှင့်အတူ မျက်ရည်တို့သည် ပါးပြင်ပေါ်သို့ .... ။

နိဂုံး၏ အဆုံး။

အပြင်တွင် မိုးတို့ ဖွဲရာမှ သဲလာလေပြီ။ သူ စိတ်မကောင်းခြင်းကြီးစွာဖြင့် ဘာပြောရမယ်မှန်းမသိအောင်ပင်။ သက်ပြင်းတစ်ချက်ကို လေးပင်စွာချလိုက်ကာ ထိုပုံပြင်ပြောသောလူကို ကြည့်လိုက်မိသည်။ လက်ကျန်ပုလင်းထဲမှ အရက်ကို အကုန်ဖန်ခွက်ထဲသို့လောင်းထည့်၍ ရေပင်မရော တစ်ရှိန်ုထိုး မော့သောက်လိုက်ပါလေသော ထိုလူ၏ ပါးပြင်ပေါ်တွင် အပြင်က မိုးနှင့်အပြိုင် ... ။

( ကျွန်တော် ၇တန်းကျောင်းသူဘ၀တုန်းက ကျွန်တော့်ရဲ့ အချစ်ဆုံးသူငယ်ချင်း နန္ဒာစုမွန် ဆီက ကြားခဲ့ရတဲ့ ဇာတ်လမ်းလေးတစ်ပုဒ်ကို မှတ်မိသလောက် ပြန်ပြီး ခံစား ရေးဖွဲ့ထားခြင်းဖြစ်ပါတယ်။ သည်းခံပြီး ဆုံးအောင် ဖတ်ပေးကြသော အကို အမများကို ကျေးဇူးတင်ရှိပါကြောင်း...။ )