အိပ်မက်၏ အလွန်

ပူပြင်းခြောက်သွေ့လွန်းတဲ့ နွေရာသီကို ကျော်လွန်၍ တစ်မိုးရောက်ခဲ့ပြန်ပါပြီ။ သည်လို မိုးဦးကျကို ရောက်တိုင်း ရင်ထဲ တစ်နေရာစီက ဒဏ်ရာဒဏ်ချက်တို့ကတော့ဖြင့် ခုထိ အနာမကျက်နိုင်သေးတာပါလား။ အပြင်တွင် မိုးတို့ဖွဲဖွဲစတင်၍ ရွာသွန်းနေလေပြီ။ သူ့ရင်တွင်လဲ ထိုမိုးနှင့်အတူ ...။

လွန်ခဲသော ငါးနှစ်ကျော်ကာလဆီသို့ သူ၏ စိတ်အာရုံတို့ ပျံ့လွင့်သွားကြပြန်သည်။ မတွေးချင်ပါဘူးဆိုမှ။ သြော် ... တိုက်ဆိုင်မှုတွေ ရှိတိုင်းလေ။

ရန်ကုန်တက္ကသိုလ်။ ဦးချစ်ဆိုင်။

သူအရောက်နောက်ကျသဖြင့် သူငယ်ချင်းအားလုံး ပွစိပွစိ ဖြစ်နေကြသည်။ သည်သူငယ်ချင်းတွေဆိုတာက သူနှင့် အလယ်တန်းကျောင်းသားဘ၀ထဲက အတွဲမပျက်ခဲ့သူတွေ။ သူ၏ အချစ်ဆုံးများဟုလည်း ပြောနိုင်သည်ပဲ။
" ဟေ့ရောင် စစ်၊ မင်းကွာ။ ချိန်းတုန်းက ချိန်းထားပြီးတော့ နောက်ကျတာ ဘာသဘောလဲ။ ပညာပြတာလားကွ။ ဟေ "
သူထိုင်ကာစတွင်ပင် ကျော်ကျော်က စတင်၍ အပြစ်တင်စကား ဆိုသည်။ ဟုတ်သည်။ သူကလဲ သူပဲလေ။
" အေးကွာ။ ငါတောင်းပန်တယ်။ နံနက်က အိပ်ယာထ နောက်ကျသွားလို့။ အဟဲ "
သူလေချိုသွေးလိုက်မိသည်။ ဒါကိုပင် သူငယ်ချင်းတို့က မကျေနပ်နိုင်သေး။
ညီညီက စတင်၍
" ကဲ၊ မင်းပြောမယ်ဆိုတာကို ပြောတော့။ ပြောစရာရှိတယ်ဆိုပြီး သူကလဲ စချိန်းသေးတယ်။ ပြီးတော့ သူပဲ နောက်ကျနေတယ်။ ဒီလက်ဘက်ရည်ဝိုင်း မင်းရှင်းရမယ် ဟေ့ရောင် "
သူပြုံးလိုက်မိသည်။ ဒီလိုပါပဲ။ သည်သူငယ်ချင်းတွေဆိုသည်က ပြောမနာ ဆိုမနာတွေကိုး။
" အေး။ ငါရှင်းပါ့မယ်ဟ။ မင်းတို့ကောင်တွေကလဲ။ ဒေါချည်းပဲ။ ငါကွာ ပြီးခဲ့တဲ့ရက်က ငါ့အကိုဝမ်းကွဲရဲ့ စာအုပ်စင်မှာ ကဗျာစာအုပ်တစ်အုပ် တွေ့လိုက်တယ်။ စာအုပ်ရဲ့ ခေါင်းစဉ်က တက္ကသိုလ်အမှတ်တရတဲ့။ အဲ့ဒါ ငါဖွင့်ကြည့်လိုက်တော့ စာအုပ်က သူငယ်ချင်းတွေစုပြီး ထုတ်ထားတဲ့ ကဗျာစာအုပ်ဖြစ်နေတယ်လေ။ ငါ အဲ့ဒီမှာ အိုင်ဒီယာတစ်ခုရတယ်ကွ။ ငါတို့ခြောက်ယောက်လဲ ပေါင်းပြီး ကဗျာစာအုပ်ထုတ်ရအောင်ကွာ။ တက္ကသိုလ်အမှတ်တရပေါ့။ ဘယ်လိုလဲ "
သူပြောရင်း သူငယ်ချင်းများ၏ မျက်နှာကိုကြည့်မိလိုက်သည်။ ထင်သည့်အတိုင်းပင်။ အားလုံးက စာရူးပေရူးများဖြစ်ကြသည့်အတိုင်း
" အာ ကောင်းလိုက်တဲ့အကြံကွာ။ မင်းခေါင်းကို ငါတို့ရွှေချထားပေးမယ်။ ထီ ဆယ်ခါပေါက်ရင်။ အဟက် "
ဗညားက ၀င်အရွှန်းဖောက်သည်။ ညီညီက
" ထုတ်တာကတော့ ဟုတ်ပြီ။ ငါတို့ဝိုင်းရေးမယ်ကွာ။ ဒါပေမယ့် အယ်ဒီတာတို့ ဖြန့်ချီရေးတို့၊ ပုံနှိပ်တို့ လိုတယ်ကွ။ အဲ့ဒါတွေရော မင်းစဉ်းစားပြီးပြီလား "
သူတစ်ချက်တော့ ငိုင်သွားသည်။ ဟုတ်သား။ ဒီကောင်ပြောမှ သတိရတယ်။ ဒါတွေကို သူစဉ်းစားရဦးမှာပဲ။ သူက ဖြစ်ချင်တာတစ်ခုကိုသာ ၀မ်းသာအားရပြောမိခြင်းဖြစ်သည်။ ဒါတွေကို မစဉ်းစားခဲ့မိပေ။

ထိုအချိန်တွင်ပင်
" ဟာ။ ကျွန်တော့်အကိုတွေက အချိန်တိကျလှချေလားဗျ။ ရောက်တာကြာပြီလား။ ကျွန်တော်က ဒီက မမထားနဲ့ မမလွင်ကို ၀င်ခေါ်နေလို့ နောက်ကျသွားတာ။ အကိုတို့နဲ့ တွေ့ပြီးရင် ကျွန်တော်တို့ ကျောင်းပြန်တက်ရမယ်လေ။ အဟက်။ "
အရွှန်းဖောက်မှုနှင်အတူ ၀င်ရောက်လာသော သူတို့ ညီမလေးတစ်ယောက်လို ချစ်ခင်ရသော ဆုပြည့်သည် သူတို့အတွက်တော့ ကလေးတစ်ယောက်လိုပင်။
သည်ညီမလေးကို သူတို့ တတိယနှစ်တွင် ဒဂုံတက္ကသိုလ် ဥပဒေဌာန၌ ကောက်ရခဲ့တာပင်။ ရှင်ဆုပြည့်ဟု သူတို့အားလုံးက ခေါ်ဆိုခဲ့သော ညီမလေးသည် ညီညီ့ ညီမ၏ အချစ်ဆုံးသူငယ်ချင်းဖြစ်ကာ ညီညီမှ တဆင့် အားလုံးအတွက် ညီမတစ်ယောက်အဖြစ် ရောက်ရှိလာခဲ့ခြင်းပင်ဖြစ်သည်။ ဆုပြည့်သည် သူတို့အားလုံးအတွက်တော့ တကယ့်ကို ပီဘိ ကလေးတစ်ယောက်နှင့် တူလွန်းပါပေစွ။

" အဟဲ။ အကိုတို့နဲ့ ကျွန်တော်မိတ်ဆက်ပေးရဦးမယ်။ ဒါက ကျွန်တော်တို့ နိုင်ငံခြားဘာသာကျောင်းမှာ ကျွန်တော်နဲ့အတူ ကိုးရီးယားဘာသာရပ်ကို သင်နေတဲ့ တစ်ခန်းထဲဖေါ် ကျွန်တော်နဲ့ အရမ်းခင်လာတဲ့ မမနှစ်ယောက်လေ။ သူက မမထားလို့ကျွန်တော်က ခေါ်တဲ့ ထားထားမေ။ သူက ကျွန်တော်က မမလွင်လို့ခေါ်တဲ့ လှဦးလွင်။ ဘယ်လိုလဲ ချောတယ်ဟုတ်။ အဟက်။ "
ပြောပြောဆိုဆို ကျွန်တော်တို့ဘက်ကိုလဲ လက်ညှိုးထိုးကာ
" မမထားနဲ့ မမလွင်။ သူက ကျွန်တော်တို့က စစ်လို့ ခေါ်တဲ့ မင်းစစ်မွန်။ ရှေးဟောင်းသုတေသနက မဟာတန်း ပထမနှစ်။ သူက မင်းညီညီမွန်။ ၀ိုင်အိုင်တီကျောင်းသား။ သူက ဆေးက မင်းဗညားစိုင်းမွန်။ သူက အင်္ဂလိပ်စာ မဟာတန်းက ကျော်သူရ။ သူက ဘူမိဗေဒက စိုင်းအိုက်ပီ နဲ့ မဟာခန့်။ ကျွန်တော်ကတော့ ဥပဒေ။ အဟက်။ သူတို့အားလုံးက ကျွန်တော့်အကိုတွေလိုပဲဗျ။ ဘော်ဘော်ကြီးတွေပေါ့ဗျာ။ ကျွန်တော် ပထမနှစ်မှာ သူတို့နဲ့စသိတာ။ ကျောင်းအပ်သွားရင်းနဲ့ပေါ့။ သူတို့က အတန်းတွေသာမတူတာ။ သိပ်ချစ်ကြတာဗျ။ သူတို့က အပတ်တိုင်း တနင်္ဂနွေနေ့နံနက်စောစောကို ဒီမိန်းထဲက ဦးချစ်ဆိုင်မှာ ချိန်းပြီး မဟုတ်တာလုပ်ဖို့တိုင်ပင်တတ်ကြတယ်။ ကျွန်တော်လဲ ကြံရာပါပေါ့။ အဟဲ။ "
ညလေးကတော့ သူတို့အားလုံးကို အချွန်နဲ့မသည်။ သူတို့ကလဲ သူတို့ပါပဲ။ အသက်တွေသာ ကြီးလာကြသည်။ ကလေးတွေလိုမျိုး ပျော်စေပျက်စေ လုပ်နေကြတုန်းရယ်။
သူကပင် စတင်၍
" အာ ဒီကလေးမ ပြောတာတွေ မယုံနဲ့နော်။ သူက ကျွန်တော်တို့ကို အချွန်နဲ့မနေကြရယ်။ သူ့တော့ ကျွန်တော်တို့အားလုံးက ကြောက်ရတယ်လေ။ အဟဲ။ တွေ့ရတာ ၀မ်းသာပါတယ်ဗျာ။ ကျွန်တော်တို့ကလဲ ခင်တတ်ပါတယ်။ သူငယ်ချင်းတိုးတယ်လို့ပဲမှတ်ပါတယ်။ ကျွန်တော်တို့ကိုလဲ သူငယ်ချင်းအရင်းတွေလိုပဲ မှတ်ပါဗျာ။ "
အားလုံးက သူ့စကားကို ၀ိုင်း၍ထောက်ခံခဲ့လေသည်။ အဲ့ဒီနေ့က ကဗျာစာအုပ်ထုပ်ရေးနဲ့အတူ သူတို့အားလုံး ပို၍ရင်းနှီးသွားကြလေသည်။ အိမ်အပြန်လမ်းတွင်တော့ အတွေးကိုယ်စီဖြင့်ပေါ့။

တကယ်တမ်း ကဗျာစာအုပ်ထုပ်တော့ အားလုံးက သူ့ခေါင်းပေါ်သို့သာပုံလေသည်။ ဗညားနှင့် အိုက်ပီက
" မင်းအရင်စတဲ့ဇာတ်လမ်း ဟေ့ရောင်။ မင်းအားလုံးတာဝန်ယူ။ ကုန်ကျစရိတ်တော့ ငါတို့အားလုံးပေါင်းပေါ့။ ဒါပေမယ့် အယ်ဒီတာကတော့ မင်းပဲလုပ်ရမှာပဲ" ဆိုပြီး သူ့အပေါ်ပုံချလေသည်။ ဒီလိုပါပဲ ဒီကောင်တွေက သူ့ကို သိပ်ချစ်ကြသည်လေ။ တော်သေးသည်က ထားက သူ့ဘက်က ကူညီခဲ့သည်။
" ထားက စာပေ ၀ါသနာပါတယ် ကိုစစ်ရဲ့။ ကိုစစ်တို့ စာအုပ်ထုပ်တာလေးမှာ ထားပါဝင် ကူညီခွင့်ရလို့ ထားက အရမ်းပျော်နေခဲ့တာ " လို့ပြောတတ်ခဲ့ပါလေသော ထားရယ်ပါ။
သြော် ထားရယ်...။ အမြဲလို နူးညံ့သိမ်မွေ့စွာနေတတ်ခဲ့ပါသော ထား။ အရာရာကို နားလည်တတ်ပါသောထား။ စိတ်ထားကောင်းမွန်စွာဖြင့် သူတစ်ပါးကို ကူညီတတ်ခဲ့ပါသောထားသည် သူ့ရင်တွင်းသို့ တစ်စစ ၀င်ရောက်လာပါတော့သည်။ ထား၏ အကူအညီဖြင့်ပင် သူတို့အားလုံး၏ နားခိုရာဟု အမည်ပေးထားသော ရင်တွင်းကဗျာစာအုပ်လေးသည် အကောင်အထည်ပေါ်လာခဲ့လေသည်။ ထိုနေ့က လူအားလုံးပျော်ရွှင်ခဲ့ကြသလို သူကိုယ်တိုင်လဲ ရင်ခုန်ခဲ့ရသည်ပဲ။
" ကျွန်တော့်ကဗျာ ပါတာတော့ ကျွန်တော်အပျော်ဆုံးပဲဗျ။ ကျောင်းမှာ သူငယ်ချင်းတွေကို ပြန်ကြွားရမယ်။ အဟဲ။ ကျွန်တော်ရောင်းဖို့ပါ တာဝန်ယူတယ်ဗျာ"
လို့ပြောခဲ့သော ညီမငယ်ဆုပြည့်သည်လဲ ထိုနေ့က အတော့်ကို ပျော်နေခဲ့သည်ပဲ။ သူတို့အားလုံး ဦးချစ်တွင်ပင် အောင်ပွဲခံခဲ့ကြပြီးနောက် အိမ်ပြန်ဖို့လမ်းခွဲလိုက်ကြသော ထိုနေ့က သူကိုယ်တိုင် ထားကို အိမ်လိုက်ပို့ဖြစ်ခဲ့သည်။ ထို့နောက် ထားတို့အိမ်ရှိရာ လမ်းထိပ်အရောက်တွင်ထားကို သူအရဲစွန့်၍
" ထားကို ကျွန်တော် တစ်ခုလောက်ပြောစရာရှိတယ်ဗျာ။ ကျွန်တော့်ကို စိတ်မဆိုးပါနဲ့နော်။ ကျွန်တော် ရင်ထဲမှာ သိမ်းမထားနိုင်တော့တဲ့စကားတစ်ခွန်းကို ထားသိအောင် ပြောပြချင်ပါတယ်။ ကျွန်တော်ထားကို သိပ်ချစ်မိပါတယ် "
သူပြောအပြီးတွင် ထားက ရှက်ပြုံးလေးပြုံး၍ ခေါင်းငုံ့သွားသော ပုံလေးသည် သူ့ရင်ထဲတွင် မနေ့တစ်နေ့ကလိုပင် အမြဲရှင်သန်နေလေတော့သည်။

ထိုနေ့မှစ၍ သူတို့နှစ်ယောက်ချစ်ခရီးသည် စတင်ခဲ့သည်ဟုဆိုရမည်။ အရာရာ အေးချမ်းလွန်းစွာဖြင့် ရှိခဲ့သော သူတို့နှစ်ယောက်၏ ချစ်ခြင်းသည် သာယာခဲ့ပါသည်။ ထား၏ စီးပွားရေးမဟာတန်း နောက်ဆုံးနှစ်စာမေးပွဲပြီးလျှင် အိမ်တွေကို ဖွင့်ပြောရန်လဲ တိုင်ပင်ထားခဲ့ပြီးဖြစ်သည်။ ထားရော သူရော အခြေအနေ အဆင့်အတန်းချင်းက သိပ်မကွာသည်မို့ အရာရာ အဆင်ပြေလိမ့်မည်ဟု နှစ်ယောက်စလုံးယုံကြည်ခဲ့မိသည်ကိုက သူတို့နှစ်ယောက်အတွက် ပိုပြီး စိုပြေစေခဲ့သည်ထင့်။ သြော်.. အခုတော့လဲလေ...။

ထား၏ နောက်ဆုံးနှစ်စာမေးပွဲအပြီးတွင် ထားပူဆာသဖြင့် ထားကို စာမေးပွဲအခန်းမှ ကြိုအပြီး ရွှေတိဂုံဘုရားသို သွားဖြစ်ခဲ့သည်။ ထိုနေ့တွင် မိုးတို့ ဖွဲဖွဲရွာနေသည်ပဲ။ မိုးဖွဲဖွဲတွင် ဘုရားရင်ပြင်တော်သည် အေးချမ်းလွန်းလှသည်။ ထားလက်ကလေးတွေက မိုးအေးလို့ထင့် အေးနေလေသည်။ ထားက သူ့ဘက်ကိုတိုး၍
" မောင်၊ ထားတို့ ဘယ်တော့မှ မခွဲရဖို့ဆုတောင်းရအောင်။ " အစိုးရိမ်ကြီးသောထားပါပေ။
" သြော် ထားရယ်။ မောင်တို့ ချစ်တာ ၂နှစ်ကျော်တောင် ကြာမှကို။ နောက်ပြီး တစ်ယောက်နဲ့တစ်ယောက်ကလဲ ဒီလောက်ချစ်မှတော့ မခွဲရပါဘူးထားရဲ့။"
လို့ သူပေါ့ပေါ့ပါးပါးပင် ပြန်ပြောဖြစ်ခဲ့သေးသည်။ ထားမျက်နှာလေးကတော့ မိုးရေစက်တွေကြား လမ်းဆန်းနေခဲ့သည်ပဲ။
အဲ့ဒီနေ့ ဘုရားမှအပြန်တွင် ထားက သူမအိမ်ကို သူတို့နှစ်ယောက်အကြောင်း အသိပေးလိုက်လေသည်။ ထားရဲ့မိဘများက သူ့ကို အိမ်လာတွေ့ဖို့ တောင်းဆိုတော့သည်။ သူမျှော်လင့်တွက်ဆထားပြီးသားမို့ ဘာကိုမှ စိုးရိမ်စိတ်မရှိဘဲ တနင်္ဂနွေတစ်ရက်တွင် ထားတို့အိမ်သို့လိုက်သွားဖြစ်ခဲ့သည်။
ထားဖေဖေနှင့် မေမေက သူ့အကြောင်းကို အေးဆေးသက်သာစွာမေးသည်။ ထားတို့အိမ်တွင် သူနေ့လည်စာ စားဖြစ်ခဲ့သည်။ ပြန်ကာနီးတွင်မှ ထားအဖေက ရုတ်တရက် သူ့ကိုကောက်မေးခဲ့သည်က
" မောင်မင်းစစ်မွန်ရဲ့ မိဘများက ပွဲရုံလုပ်ငန်းကို လုပ်တာနော်။ အဲ့ဒီပွဲရုံက ဘာနာမည်ပါလိမ့်။ "
" ဟုတ်ကဲ့ဦး၊ ကျွန်တော့်မိဘများရဲ့ ပွဲရုံလုပ်ငန်းက မေတ္တာပွဲရုံပါ။ ဘာဖြစ်လို့လဲခင်ဗျာ။ "
" သြော်၊ ဘာမှမဖြစ်ပါဘူး။ မေးကြည့်တာပါကွာ။ "
ထိုနေ့က သူစိတ်တော့ ပေ့ါပါးခဲ့ရသေးသည်ပဲ။

ဒါပေမယ့် သူမထင်မှတ်ထားခဲ့သောအကြောင်းအရာက ထိုနေ့ည သူနှစ်နှစ်ခြိုက်ခြိုက်အိပ်ပျော်နေချိန် ၀င်လာသော ထား၏ဖုန်းခေါ်သံတွင် စလေသည်။ ဖုန်းထဲတွင် ထား၏ ငိုရှိုက်သံတစ်ဝက်နှင့် တိုးတိုးလေး ပြောသော အကြောင်းအရာက သူ့နားထဲတွင် ဗုံးတစ်လုံးကဲ့သို့ ပြင်းထန်လွန်းပေစွ။
" မောင်၊ အိမ်က ထားနဲ့ မောင့်ကို သဘောမတူနိုင်ဘူးတဲ့။ မောင့်မိဘများနဲ့ ထားမိဘများဟာ စီးပွားရေးနဲ့ပတ်သတ်ပြီး အကြိမ်ကြိမ် အတိုက်အခံဖြစ်ဖူးတာမို့ မောင့်ကို ထားနဲ့ သဘောမတူနိုင်ဘူးတဲ့။ မောင့်မိဘများနဲ့ ထားမိဘတွေက စကားမပြောချင်ဘူးတဲ့မောင်ရယ်။ ထားကိုလဲ တစ်နေရာရာ ပို့မယ်ဆိုပြီး စီစဉ်နေတယ်။ ထား မောင်နဲ့မခွဲနိုင်ဘူး။ "
ဆိုတဲ့ ထားရဲ့ တိုးလျတဲ့ အသံလေးဟာ သူ့ရင်ကို ဗြောင်းဆန်စေခဲ့ပါသည်။ သြော် ထားရယ်။ သူ့ကို ချစ်နိုင်လွန်းသောထားကို သူဘယ်လို ခွဲရက်နိုင်ပါမည်လဲလေ။
" ထား၊ မောင်လဲ ထားနဲ့ မခွဲနိုင်ပါဘူး။ မောင်က ထားကို တင့်တောင်းတင့်တယ်နဲ့ တောင်းရမ်းလက်ထပ်ယူချင်ပေမယ့် ဒီလိုမျိုး ကြုံလာရပြီဆိုရင်တော့ မောင်တို့ ရှေးလူတွေရဲ့ ထုံးစံအတိုင်း ခိုးပြေးကြတာပေါ့ကွာ။ ဒါပေမယ့် မောင်ကြိုးစားကြည့်ချင်ပါသေးတယ်။ ပြေလည်မယ့်နည်းကိုပေါ့။ ထားကို မျက်နှာမငယ်စေချင်ဘူးလေ။ "
လို့ပြောပြီးဖုန်းချအပြီးမှာ သူ့ရင်တွေ လှိုင်းထန်နေခဲ့လွန်းသည်ပဲ။

နောက်တစ်နေ့နံနက်၌ သူ့မိဘများကို ထားနဲ့ပတ်သတ်ပြီး ဖွင့်ပြောပြ အကူအညီတောင်းခဲ့ပေမယ့် သူ့မိဘများသည်လဲ ထားမိဘများနည်းတူ တင်းမာနေခဲ့သည်။
"ငါကတော့ လိုက်စကားမပြောနိုင်ဘူးကွ" လို့ပြောပြီး ထထွက်သွားတဲ့ ဖေဖေ့ရဲ့နောက်ကျောပြင်ဟာ သူ့အတွက်တော့ ပူလောင်လွန်းပေစွ။

သူတစ်ခုခုတော့ စဉ်းစားရပေတော့မည်။ ထားကို သူဘယ်လိုမှ မစွန့်လွှတ်နိုင်။ သူ့အတွက် ထားသည်သာ တစ်ဦးတည်းသော ချစ်မြတ်နိုးရာဖြစ်သည်။ ထို့ကြောင့် သူဆုံးဖြတ်ချက်တစ်ခုချဖြစ်ခဲ့သည်။ ထားကို သူ့ရဲ့အချစ်ဆုံးသူငယ်ချင်း စိုင်းအိုက်ပီ၏ ဇာတိမြေဖြစ်သော ပင်လုံသို့ခေါ်သွားရန်ပင်။ အဲ့ဒီနေ့က မိုးဖွဲဖွဲရွာနေတာကြောင့် ခရီးလမ်းက မကောင်းခဲ့ပါ။ ထားလက်လေးတွေက မိုးရွာတိုင်းအေးနေတတ်ခဲ့တာ။ သူ့လက်တွေနဲ့ ထားလက်ကို သေချာဆုပ်ကိုင်ပေးနေကျဖြစ်ခဲ့တာဟာ ခုလိုမိုးရွာတိုင်းပါပဲလေ။
သူတို့၂ယောက် နံနက်အစောကြီး ကားဂိတ်ကိုရောက်တော့ အိုက်ပီက စောင့်နေခဲ့ပေးသည်။ သူနှင့်အတူ သွားရမှာလေ။ ဒီခရီးက။ ထားကတော့ သူ့ကိုသာ အားကိုးတကြီးပေါ့။ ကားဂိတ်တွင် သူငယ်ချင်းအားလုံး စုံလင်စွာရောက်နေခဲ့သည်။
" ကိုစစ်၊ မမထားကို စိတ်ချမယ်နော်။ ဂရုလဲစိုက်ပြီး သွားကြဦးနော်။ ကျနော်တို့ဆီကိုလဲ အကျိုးအကြောင်းဖုန်းဆက်ပါ။ ကျနော်က စိတ်ပူနေမှာဗျ။ " လို့ ပြောခဲ့ပါလေသော ညီမလေးဆုပြည့်သည်လဲ စိတ်ပူရှာသည်ပဲကိုး။

သူတို့ကားပေါ်တက်တဲ့အထိ လက်တပြပြနှင့် ကျန်ခဲ့သော သူငယ်ချင်းတစ်စုတို့သည် သူနှင့်ထားအတွက် ဆုတောင်းပေးနေကြမည်မှာ အသေအချာပင်။ သြော်.. ထားနဲ့ သူ့ရဲ့ ဘ၀ခရီးဟာ စခဲ့ပြီပဲလေ။ သူတို့ခရီးသည် အစအဆုံး အဆင်ပြေစွာနဲ့ ပြီးဆုံးသွားလိမ့်မည်ဟု သူမျှော်လင့်ခဲ့သည်။ တကယ်လဲ အိုက်ပီတို့ မြို့ရောက်တော့ အစစ အဆင်ပြေခဲ့သည်ပဲ။

တစ်နေ့ပေါ့။ အဲ့ဒီတစ်နေ့ကို သူ့တစ်သက် မေ့လို့ရတော့မည် မထင်ပါချေ။ အဲ့ဒီနေ့က သူနှင့်ထားတို့ နံနက်စောစော ဈေးဝယ်ပြီး ပြန်အလာ အိုက်ပီတို့အိမ်ရှေ့တွင် ထားတို့အိမ်က ကားရပ်ထားသည်ကို တွေ့လိုက်ရသည်။ သူရောထားရော တစ်ယောက်လက်ကို တစ်ယောက် ပိုမို၍ တင်းကျပ်စွာ ဆုပ်ကိုင်လိုက်မိသည်။ ဘာပဲဖြစ်ဖြစ်ရင်ဆိုင်ရမည်လေ။ သူတို့အိမ်ပေါ်တက်လိုက်တော့ ထားအမေရော အဖေရောက မျက်နှာမကောင်းစွာဖြင့် ထားဒီမှာ ရှိနေကြောင်းကို လွင်လွင်ကို အတင်းမေးမှ သိရကြောင်း၊ ထားကို ပြန်ခေါ်သွားချင်ကြောင်း၊ အိမ်မှာလာတောင်းရန်သာ ပြောကြသည်။ သူလဲ ထားကိုစိတ်မချစွာ ထည့်ပေးလိုက်ရတော့သည်။ ထားက ပြန်လိုက်သွားဖို့ပြင်ချိန်တွင် သူတကယ် စိတ်မကောင်းပါ။ ထားကို သူမခွဲနိုင်တာ မခွဲချင်တာကတော့ ရင်ထဲမှာ ဖြစ်တည်နေခဲ့သည်။
" မောင်၊ ထားကို မြန်မြန်လာခေါ်ပါနော်။ ထား မောင်နဲ့ဝေးရရင် သေလိမ့်မယ်။ "
လို့ပြောခဲ့ပါလေသောထား။ သူတကယ်ကို နာကျင်ခဲ့မိရသည်။

ထားသွားမှတော့ သူလဲ ဒီမှာ မရှိချင်။ သူလဲ ပြန်ဖို့ စီစဉ်မိသည်။ ထားတို့ကားနှင့်တော့မဟုတ်။ သူက အိုက်ပီ၏ ဆိုက်ကယ်ဖြင့် တောင်ကြီးသို့ဆင်းမည်ဖြစ်ပြီး တောင်ကြီးမှ တစ်ဆင့် အဝေပြေးကားနှင့် ပြန်ရမည်ဖြစ်သည်။ ထို့ကြောင့် ထားတို့ကားထွက်သွားချိန်တွင် သူလဲ အိုက်ပီနှင့်အတူ ဆိုက်ကယ်နှင့် ထားတို့ကားနောက်မှ လိုက်လာခဲ့တော့သည်။ ထိုနေ့ကလဲ မိုးသည် ဖွဲနွဲ့စွာ ရွာစပြုနေခဲ့သည်ပါပဲ။

ပင်လုံအထွက် ကားလမ်းချိုးအကွေ့တောင်တက် လမ်းတွင် ထားတို့ကား ရုတ်တရက် ရပ်သွားသည်။ ထို့နောက် ကားတံခါး ဖွင့်၍ ထားပြေးဆင်းလာလေသည်။ သူပါလာမှန်း သိပုံမရ။ ထားပုံက ကမူးရှူးထိုးနိုင်လှသည်။ သူလဲ ရုတ်တရက် လန့်သွားကာ ဆိုက်ကယ်ကိုရပ်၍ ထားနောက်ကို ပြေးလိုက်မိသည်။ ထားမိဘများလဲ အလန့်တကြားဖြစ်၍ ထားနောက်ကို ပြေးလိုက်ကြသည်။ အဲ့ဒီမှာ သူမမျှော်လင့်မိသည်က လမ်းကွေ့မှ တက်လာနေသောကုန်ကားကြီးသည် ပြေးနေသော ထားကို ... ။

သြော်.. အဖြစ်အပျက်များသည် မနေ့တစ်နေ့ကလိုပါပဲလား။ ထားဆုံးပြီးနောက်မှ သူသိရသည်မှာ ထားမိဘများက ထားကို ကားပေါ်တွင် သူနှင့်ပေးစားမည်မဟုတ်ကြောင်း။ ထားကို နိုင်ငံခြားပို့မည်ဖြစ်ကြောင်းပြောသဖြင့် ထားက အပေါ့သွားချင်ဟန်ဆောင်၍ ကားပေါ်မှ ဆင်းပြေးခြင်းဖြစ်သည်တဲ့။ ထားရယ်။ သူ့ရင်တွေ မွမွကြေခဲ့ရသည်။ ထားဆေးရုံရောက်ပြီး သတိတစ်ချက်ပြန်လည်အလာတွင် သူ့ကိုသာ မေးခဲ့သောထားရဲ့ ချစ်ခြင်းသည် သူ့ရင်ကို တစ်စစီဖြစ်စေခဲ့သည်။
" မောင်၊ ထားကို လာခေါ်ပါ။ " လို့ ကယောင်ကတမ်းပြောအပြီး ထားအပြီးအပိုင် သူ့ကို ခွဲသွားခဲ့သည်မှာ ယနေ့အထိပါပေ။ ထား၏ မိဘများသည်လဲ နောင်တရခြင်းများစွာနှင့်ပေါ့။ သူကတော့ ထားအတွက် ယူကြုံးမရခြင်းများစွာဖြင့် ရှင်သန်ခဲ့ရသည်မှာ ...။


အပြင်မှာ မိုးတို့ ဖွဲရာမှ သည်းလာလေပြီ။ သူ၏ရင်သည်လဲ ထိုမိုးနှင့်အတူ ... ။


( ဖြစ်ရပ်မှန် ဖြစ်ပါသည်။ အမည်တွေအားလုံးသည်လဲ အမှန်များသာဖြစ်ပါသည်။ မမထားမှလွဲ၍ ကာယကံရှင်တွေအားလုံး ယနေ့ထက်တိုင် သက်ရှိထင်ရှားရှိနေပါသေးကြောင်း။ )
ို